İtirilmiş uşaqlar şəhəri

Dumanlı dəniz sahilindəki qəsrdə qorxunc alim Krank məskən salıb. Yuxu görə bilmədiyi üçün vaxtından əvvəl qocalan bu qəddar personaj uşaqların xəyallarını mənimsəməyə çalışır. Onun təlimatı ilə hərəkət edən sikloplar laboratoriyada yuxuları oğurlamaq məqsədilə körpələri qaçırırlar.

Lakin balacalar qorxu içində olduqları üçün alim yalnız onların kabuslarını görür və bu ona kömək etmir. Qaçırılan kiçik qardaşını tapmaq istəyən sirk pəhləvanı Uan şəhərə gəlir. Axtarışda ona cəsur doqquzyaşlı qız Miett və onun yetimlərdən ibarət kiçik dəstəsi yardım edir.

1995-ci ildə ekranlara çıxan «The City of the Lost Children» fantastika filminin rejissorları Mark Karo və Jan-Pyer Jönedir. Fransa, Almaniya, İspaniya və Belçikanın birgə istehsalı olan ekran əsərində əsas rolları Ron Perlman, Jüdit Vitte və Dominik Pinon canlandırıb.