Sehrbaz: Əbədiyyət arzusu

Yin-yan sənətini öyrənən Tsinmin uşaqlıqdan bəri qoruyucu tilsimləri tətbiq etməkdə çətinlik çəkirdi. Bu çatışmazlıq üzündən Qəddar İlanın kölgəsi ilə döyüş zamanı onun müəllimi zəhərlənərək can verir. Ustadı dünyasını dəyişməzdən qabaq gəncə həmin təhlükəli varlığın əsrlərdir zəncirləndiyi İmperiya şəhərinə yollanmağı tapşırır.

Paytaxta çatan Tsinmin burada digər gənc usta Boya ilə qarşıdurma yaşayır. Çox keçmədən başqa bir sehrbazın müəmmalı ölümü onları düşmənçiliyi unudaraq birgə təhqiqat aparmağa məcbur edir. Şübhələr isə nəhəng İlanın oyanmasının qarşısını alan dörd keşikçini canlandırmaq üçün mərasimə gəlmiş cadugərlərin üzərinə yönəlir.

«Qing ya ji» adlı detektiv və fentezi janrında çəkilmiş Çin filminin rejissoru Qo Tszinmindir. 2020-ci ildə təqdim olunan ekran əsərində baş rolları Mark Çao, Den Lun, Van Tszıven və Toni Van canlandırıb.