Qadınların quyruğu olanda

Kimsəsiz qalmış yeddi mağara adamı balaca bir adada təkbaşına ömür sürürdü. Qəfil baş verən böyük yanğın adadakı bütün bitkiləri kül etdikdən sonra qardaşlar özlərinə yeni sığınacaq tapmaq üçün yola düşürlər. Günlərin bir günü onlar özlərinə çox bənzəyən, lakin hamar dərisi və uzun saçları olan qəribə bir canlı tuturlar.

Filli adlı bu qadın məxluq qardaşlardan biri olan Ulliyə yaxınlıq göstərir və bir-birlərini yeməkdənsə, birlikdə vaxt keçirməyin daha maraqlı olduğuna onu inandırır. Ulli sevgilisini qardaşlarından gizlətsə də, sirr tezliklə açılır və digər kişilər də bu qəribə əyləncəyə qoşulmaq istəyirlər. İki qaçağın ardınca düşən qalan altı qardaş isə Fillinin yüz əlli qadından ibarət vəhşi qəbiləsinin əlinə keçir.

1970-ci ildə çəkilmiş İtaliya istehsalı olan «Qadınların quyruğu olanda» (Quando le donne avevano la coda) fantastik komediyasının rejissoru Paskuale Festa Kampaniledir. Baş rolları Culiano Cemma, Zenta Berger, Qabriella Corcelli və Paula Borboni canlandırıblar.