Tumbbad

Qədim əfsanəyə görə, İlahə ananın sevimli ilk övladı Hastad dünyadakı bütün qızıllara sahib olmaq istədiyi üçün digər tanrılar tərəfindən cəzalandırılaraq unudulub. İllər sonra, XX əsrin əvvəllərində Hindistanın ucqar Tumbbad kəndi yaxınlığında yerli lordun nikahdankənar oğlu Vinayak böyüyür. Ailənin qaranlıq evində oyanıb uşaqları yeməsin deyə daim yedizdirilməli olan lənətlənmiş qoca ifritə yaşayır, ətrafda isə gizli sərvətlər haqqında şayiələr gəzir. Lord öldükdən sonra anası Vinayakdan bu yerlərə bir daha dönməyəcəyinə dair söz alaraq onu böyük şəhərə aparır.

Uzun illər keçir, lakin artıq böyümüş Vinayak verdiyi vədi pozmaq qərarına gəlir. O, atasının tərk edilmiş qəsrində külli miqdarda xəzinə gizləndiyinə inanaraq yenidən doğma kəndinə üz tutur. Sərvət hərisliyi onu qədim qorxuların və unudulmuş varlığın gizləndiyi sirli məkana doğru aparır.

«Tumbbad» filmi 2018-ci ildə Hindistan və İsveç kinematoqrafçılarının birgə istehsalı ilə ekranlara çıxıb. Qorxu və fentezi janrında çəkilən ekran əsərinin rejissorları Rahi Anil Barve və Adeş Prasaddır, əsas rolları isə Soham Şah, Dipak Damle və Mohammad Samad canlandırıb.