Minotavr

Qədim şəhər ağır bir bəla ilə üz-üzədir: hər beş ildən bir doqquz gənc uzaq adada yaşayan Minotavra qurban verilir. İnsan bədənli və öküz başlı bu yırtıcı minlərlə dəhlizdən ibarət qaranlıq labirintdə məskən salıb. İndiyə qədər həmin məkana göndərilən insanların heç biri oradan sağ qayıtmayıb və dəhşətli məxluqun qurbanına çevrilib.

Teo adlı gənc həm xalqını bu zülmdən qurtarmaq, həm də sevdiyi qızı xilas etmək qərarına gəlir. O, bədheybətin yaşadığı sirli adaya yollanır və yerli hökmdarla razılaşır: adanın sahibi nişanlısını yalnız canavarın başı qarşılığında azad edəcəyini bildirir. Teo labirintin dərinliklərinə enərək qəddar yırtıcı ilə təkbətək döyüşə girməlidir.

2006-cı il istehsalı olan «Minotaur» filminin rejissoru Conatan İnqlişdir. Ekran əsəri İspaniya, Böyük Britaniya, Almaniya, Fransa, İtaliya və Lüksemburq kinematoqrafçılarının birgə əməyi ilə ərsəyə gəlib. Əsas rolları Syuzan Uesterbi, İnqrid Pitt, Şames-Dine Taha və Mohamed Takurt ifa edirlər.