Tideland

On yaşlı Celiza-Rouz asılılıqlardan əziyyət çəkən valideynlərinin əhatəsində böyüyür. Qoca rokçu atası vaxtını narkotik təsiri altında keçirir, anası isə metadondan asılıdır. Bütün bunlara baxmayaraq ailəsini sevən qızcığaz, tənhalığını başı qopmuş oyuncaq gəlinciklərlə bölüşür.

Anasının qəfil ölümündən sonra atası Nuh qızını götürüb uşaqlıq illərinin keçdiyi köhnə evə yollanır. Şəhərdən uzaqda, ucsuz-bucaqsız buğda zəmilərinin ortasında qalan qəhrəmanlar reallıqdan qaçmağa çalışır. Əyalətin bu qaranlıq küncündə uşaq təxəyyülü qorxulu reallıqlarla qarşılaşır.

Böyük Britaniya və Kanada istehsalı olan «Tideland» filmi 2005-ci ildə ekranlara çıxıb. Rejissor Terri Gilliamın lentə aldığı dramatik fentezi janrlı ekran əsərində baş rolları Codell Ferland, Ceff Brices, Cennifer Tilli və Canet Maktir canlandırıb.