Rampo cəhənnəmi

«Rampo cəhənnəmi» filmi yapon qorxu ustası Edoqava Ramponun qısa hekayələri əsasında çəkilmiş dörd fərqli hekayəni bir araya gətirir. Digər hissələri bir-birinə bağlayan sürrealist «Mars kanalı» adlı ilk epizod cəhənnəmin dərinliklərinə batan qəribə göl tapmış bir adamdan bəhs edir.

Sonrakı epizodlarda personajlar müxtəlif sınaqlarla üzləşirlər. «Güzgülər cəhənnəmi» hekayəsində xüsusi detektiv qadınların sirli ölümlərini araşdırır və yeganə ipucu qurbanların evlərindəki xüsusi güzgülər olur. «Tırtıl» bölümündə müharibədən əlsiz və ayaqsız qayıdan əsgər öz arvadının amansız istehzalarına dözmək məcburiyyətində qalır. Sonuncu «Böcəklər» novellası isə mikrob qorxusundan əziyyət çəkən və aktrisa olan müdirəsinə görə ağlını itirən sürücünün vəziyyətini göstərir.

Fantaziya və dəhşət janrındakı bu Yaponiya filmi 2005-ci ildə ekranlara çıxıb. Ekran əsərinin rejissorları Akio Jissoji və Hisayasu Sato, baş rol ifaçıları isə Kaiji Moriyama, Minori Terada, Yuko Daike və Yukiko Okamotodur.