Dürüst namizəd

Keçmişdə səs-küylü məhkəmə çəkişməsi sayəsində tanınan Çu San-suk parlamentdə artıq üçüncü dəfə yer qazanmağa çalışır. Siyasətə təsadüfən qatılan qadın illər ərzində seçicilərə yalan danışmaqda böyük təcrübə toplayıb. O, insanların rəğbətini qazanmaq naminə hətta sağ olan yaşlı anasını belə xalqa dünyasını dəyişmiş kimi təqdim edib.

Qızının daimi yalanlarından təngə gələn ana növbəti təşviqat dövründə dua edərək bir dilək tutur. Bu arzudan sonra möcüzə baş verir və San-suk artıq heç kimə yalan deyə bilmir, ağlına gələn həqiqəti birbaşa dilə gətirir. Çoxsaylı gizli sirləri olan namizədin dürüstlüyü onun seçki qərargahı üçün əsl fəlakətə çevrilir.

«Dürüst namizəd» (Jeongjikhan hubo) adlı Cənubi Koreya istehsalı olan fantastik komediya filmi 2020-ci ildə işıq üzü görüb. Ekran əsərinin rejissoru Çan Yu-condur. Filmin əsas rollarında Ryu Sın-mu, Kim Ho-cun, Yan Na-yon və Çu Min-çxan çəkiliblər.