Məktəbli A

Orta məktəb şagirdi Can Mi-re həmyaşıdları ilə ünsiyyətdən qaçan qapalı bir qızdır. Evdə spirtli içki aludəçisi olan atasının şiddətinə məruz qalan yeniyetmə yalnız çoxistifadəçili onlayn oyunda rahatlıq tapır. Məktəbdə keçirilən yazı müsabiqəsində ikinci yeri tutduqdan sonra sinfin ən populyar qızı onunla dostluq etməyə başlayır.

Bu münasibət uzun çəkmir və tezliklə aralarındakı bağ qopur. Eyni zamanda Mi-renin sığındığı sevimli onlayn oyunun bağlanacağı elan edilir. Təkliklə üz-üzə qalan gənc qız ayrılmaz virtual yoldaşlarından biri ilə real həyatda görüşmək qərarına gəlir.

2018-ci il istehsalı olan «Məktəbli A» filmi Cənubi Koreyada dram, komediya və fentezi janrlarında lentə alınıb. Ekran əsərinin rejissoru Li Qyon-sopdur, əsas rolları isə Ok Yun-cun, Kim Con-xva, Li San-hi və Con Da-bin canlandırıb.