O biri dünya

Kori Torşon atasının vəfatından sonra Luiziana ştatında yerləşən böyük bir malikanəyə sahib çıxır. Gənc oğlan burada hər şeyi yenidən başlamağa hazırlaşarkən, atasının vida məktubları ilə qarşılaşır. Məktublardan aydın olur ki, mərhum ağlasığmaz bir arzuya qapılıb və nəyin bahasına olursa-olsun dirilmək istəyir.

Çox keçmədən Kori qara magiya ilə məşğul olan və keçmişdə atası ilə əlaqəsi olmuş cazibədar Doloreslə tanış olur. Qadının sirli aurası oğlanı özünə cəlb etsə də, dünyasını dəyişmiş atanın ruhu onu rahat buraxmır. Ətrafını bürüyən qaranlıq cadular və qorxunc xəyallar Korini real həyatla xəyalların fövqündəki başqa bir aləm arasındakı sərhədə gətirib çıxarır.

1991-ci il istehsalı olan «Netherworld» qorxu filminin rejissoru Devid Şmöllerdir. ABŞ istehsalı olan ekran əsərində Corc Kelli, Holli Floriya, Cessika Kervin və Robert Labross kimi aktyorlar çəkiliblər.