Pinokkionun qisası

Meşədə qətlə yetirilmiş oğlan uşağının cəsədinin yanında taxtadan hazırlanmış Pinokkio kuklası tapılır. Öz övladını öldürməkdə günahlandırılan ata Vinsent Qotto elektrik stulunda edam cəzasına məhkum edilir. Həmin müttəhimin müdafiəsini öz üzərinə götürən vəkilin qızı Zoi isə təsadüf nəticəsində bu taxta oyuncağa sahib olur.

Balaca qız yeni oyuncağına böyük sevgi bəsləyərək onu hər kəsdən üstün tutur. Lakin bu taxta fiqur heç də sadə və hərəkətsiz marionet deyil. Qorxunc fiqur insanların gündəlik həyatına olduqca qəddar şəkildə müdaxilə etməyə və ətrafa zərər yetirməyə başlayır.

ABŞ istehsalı olan «Pinocchio's Revenge» qorxu, detektiv və fentezi filmi 1996-cı ildə ekranlara çıxıb. Ekran əsərinin rejissoru Kevin Tennidir. Əsas obrazları Sara Kayte Koxlan, Rob Harts, Canet MakLaxlan və Ron Kənada canlandırıblar.