Sehr

İllüziyaçının köməkçisi işləyən Mayra zəngin prezidentliyə namizədlə ailə qurmağa hazırlaşır. Lakin toya az qalmış fikrindən daşınaraq gizlicə Meksikaya qaçır. Aldadılmış bəy Mayranı tapmaq üçün Alek adlı xəfiyyə tutur. Qadının izinə düşən xəfiyyə gözlənilmədən ona aşiq olur.

Bu ərəfədə Mayranın qarşısına fırıldaqçı Dok çıxır. Qadında qeyri-adi cadugərlik qabiliyyətləri görən bu adam onu mayyalıların əfsanəvi iksirini axtarmağa razı salır. Həmin iksir tapana böyük sərvət vəd edir. Beləliklə, cənubi Meksika cəngəlliklərinə üz tutan Mayra, Alek və Dok bir-birlərini, eyni zamanda rastlaşdıqları yerli kələkbazları və cadugərləri aldatmağa çalışırlar.

«Rough Magic» filmi 1995-ci ildə ABŞ, Böyük Britaniya və Fransa kinematoqrafçılarının birgə istehsalı ilə çəkilib. Komediya, dram və fentezi janrlarını birləşdirən ekran əsərinin rejissoru Kler Piploudur. Əsas rollarda Rassel Krou, Den Çarlz Zukoski, Tomas Rozales kiçik və D.U. Moffett çəkiliblər.