Şahzadə Valiant

Cəngavər turniri zamanı vikinqlər gizlicə Kamelot qalasına soxularaq Kral Arturun hakimiyyət rəmzi sayılan əfsanəvi Ekskalibur qılıncını oğurlayırlar. Gənc silahdaşıyan Valiant cəsarət göstərib ağasının zirehini geyinir. O, müqəddəs yadigarı nəyin bahasına olursa-olsun geri qaytaracağına söz verir.

Özü də cəngavər olmağı arzulayan şahzadə Eylin bu təhlükəli yolda gəncə qoşulur. Onlar vəhşi oğruların izinə düşür və qəddar cadugər Morqananın qurduğu hiyləgər tələlərlə üzləşirlər. Valiant bütün çətinlikləri dəf edib qələbə qazanmağı və kraldan gözəl Eylinlə evlənmək üçün icazə almağı planlaşdırır.

«Şahzadə Valiant» (Prince Valiant) macəra filmi rejissor Entoni Hikoks tərəfindən lentə alınıb. Böyük Britaniya, Almaniya və İrlandiyanın birgə istehsalı olan 1997-ci il ekran əsərində Ketrin Heyql, Udo Kir, Markus Şenkenberq və Coanna Lamli rol alıblar.