Divarlardan keçən Qaru-Qaru

Sadə məmur Leon Dütilel içkili vəziyyətdə evinə qayıdarkən təsadüfən bərk divarın içindən keçib otağına daxil olur. Özündə bu cür qeyri-adi bacarıq aşkar edən qəhrəman adi həyat tərzini qorumağa, sadəcə gecələr Parisin gizli guşələrini kəşf etməyə qərar verir.

Şəhər gəzintilərinin birində o, Süzen adlı cazibədar ingilis oğru qadının mənzilə girdiyini görür. Qadına vurulan Leon ona cinayət yolunu atıb ailə qurmağı təklif etsə də, Süzen sıravi dəftərxana işçisini deyil, ancaq cəsur bir qəhrəmanı istədiyini bildirir. Sevdiyi qadının rədd cavabından sonra Leon bankları ard-arda soymağa başlayır və boş qalmış seyflərdə «Qaru-Qaru» imzasını qoyur. Tezliklə bütün Paris bu sirli qarətçidən danışır və Süzen də onunla görüşmək xəyalına düşür.

«Divarlardan keçən Qaru-Qaru» (Le Passe-muraille) adlı fentezi komediyasını rejissor Jan Buaye çəkib. Fransa və İtaliyanın birgə istehsalı olan bu film 1951-ci ildə ekranlara çıxıb. Əsas rolları Burvil, Coan Qrinvud, Jerar Uri və Roje Trevil canlandırıb.