Dünyanın ən tənha oğlanı

Oliver uşaqlıqdan bəri cəmiyyətdən təcrid olunmuş vəziyyətdə böyüyüb. Anası onun yalnız evdə qalmasını, sadəcə televiziya və özü ilə ünsiyyət qurmasını yetərli hesab edirdi. Qadının bədbəxt hadisə nəticəsində ölümündən sonra gənc oğlan psixiatriya xəstəxanasına düşmək təhlükəsi ilə üz-üzə qalır. Məhkəmə ona cəmiyyətə uyğunlaşmaq və bir həftə ərzində dost tapmaq tələbi qoyur.

Canlı insanlarla münasibət qura bilməyən Oliver çıxış yolunu qəribə bir üsulda tapır: qəbiristanlığa gedərək bu yaxınlarda vəfat etmiş populyar bir gəncin cəsədini qazıb evinə gətirir. Bununla kifayətlənməyən qəhrəman ailə qurmaq xəyalı ilə təyyarə qəzasında həlak olan digər meyitləri də otağına toplayır. Hellouin gecəsində isə evdəki bu ölülər qəflətən canlanmağa başlayır.

Böyük Britaniya istehsalı olan «The Loneliest Boy in the World» adlı fantastik komediya filmi 2022-ci ildə təqdim edilib. Ekran işinin rejissoru Martin Ouendir. Əsas rolları Ben Nilon, Syuzan Vokoma, Kerol Enn Uotts və Nikola Roberts canlandırıblar.