Tapmaca

Toy gününün səhəri gənc gəlin gözlənilməz tənhalıqla üzləşir, çünki əri pul qazanmaq həvəsinə düşərək kəndi tərk edir. Ticarət naminə ailəsini arxa plana atan bu adam uzun müddət geri qayıtmır. Vaxt keçdikcə kənd sakinləri onun artıq həyatda olmadığını düşünməyə başlayırlar.

Elə bu ərəfədə qadına aşiq olan bir ruh onun ərinin cildinə girərək evə daxil olur. Özünü həyat yoldaşı kimi qələmə verən bu varlıq gənc qadına qayğı göstərir və aralarında səmimi məhəbbət yaranır. Lakin beş il sonra əsl ər qəfildən kəndə dönəndə hər şey alt-üst olur və çətin vəziyyət yaranır.

Rejissor Amol Palekarın lentə aldığı «Paheli» filmi 2005-ci ildə Hindistanda istehsal olunub. Fentezi və melodram janrlarını birləşdirən bu ekran əsərində əsas rolları Şahrux Xan, Rani Mukherci, Anupam Kher və Nasiruddin Şah canlandırıblar.