Döyüşçülər qapısı

Məktəbli Cek Bronson kompüter oyunlarında asanlıqla qələbələr qazansa da, adi həyatda çətinliklərdən qaçır və özünü cəsarətsiz hesab edir. Bir gün gənc oğlanın işlədiyi antikvar dükanının sahibi ona qədim bir Çin sandığı verir. Həmin gecə bu sehrli əşyanın içindən Cekin otağına gözlənilmədən iki yad adam çıxır.

Gələnlər atası zəhərlənmiş şahzadə Sulin və onun şəxsi mühafizəçisi Çjou olur. Taxt-tacı ələ keçirən düşmənlər şahzadəni oğurlayanda, Cek qorxularını kənara qoyub qızın ardınca qədim nağılvari Çin torpaqlarına yollanmaq məcburiyyətində qalır.

«Döyüşçülər qapısı» filminin rejissoru Matias Höhnedir. Kanada, Çin və Fransanın birgə istehsalı olan bu fantastik macəra lenti 2016-cı ildə ekranlara çıxıb. Əsas obrazları Uraya Şelton, Deyv Batista, Kara Xuey və Ron Smurenburq canlandırıblar.