Deyv labirint düzəltdi

Otuz yaşlı Deyv başladığı işləri heç vaxt sona çatdıra bilmir. Sevgilisi Enni həftəsonu səfərə gedərkən ona qapının kilidini təmir etməyi tapşırır. Lakin gənc oğlan bu sadə tapşırıq əvəzinə qonaq otağında karton qutulardan böyük bir labirint qurmağa başlayır.

Evə qayıdan Enni karton tikilinin içəridən inanılmaz dərəcədə böyüdüyünü görür. Quraşdırdığı bu məkanda itib qalan Deyv oradan təkbaşına çıxa bilmir. Sevgilisini xilas etmək istəyən Enni dostlarını köməyə çağırır və onlar birlikdə kağız divarların arasına daxil olurlar.

ABŞ istehsalı olan «Deyv labirint düzəltdi» (Dave Made a Maze) filmi 2017-ci ildə rejissor Bill Uotterson tərəfindən çəkilib. Baş rollarda Nik Tun, Cessika Qreyvz, Rik Overton və Frenk Kaeti çəkiliblər.