Keçmiş rəfiqələrin kabusları

Qadınlarla münasibətlərə heç vaxt ciddi yanaşmayan Konnor Mid eyni vaxtda konfrans zəngi vasitəsilə üç sevgilisindən ayrıla bilən biridir. Qardaşının toy mərasiminə gələn bu qadınbazın əsas niyyəti isə hələ toruna düşməmiş gəlinin rəfiqəsini yoldan çıxarmaq olur.

Lakin vaxtilə ona qadınları aldadıb atmağı öyrədən mərhum Ueyn dayısının ruhu peyda olaraq vəziyyəti dəyişir. Dayı qardaşı oğlunun qəlbində həqiqi sevgiyə inam oyatmaq qərarına gəlir. Bu çətin tapşırığın öhdəsindən gəlmək üçün o, Konnorun keçmiş sevgililərinin ruhlarını köməyə çağırır.

Fantastika və melodram janrlarını birləşdirən «Ghosts of Girlfriends Past» filmi 2009-cu ildə ABŞ-da rejissor Mark Uoters tərəfindən çəkilib. Ekran əsərində baş rolları Maykl Duqlas, Emili Baldoni, Emma Stoun və Erin Uayatt ifa ediblər.