Fenster zum Sommer

Yuliana sevdiyi insan Avqust ilə birlikdə atasının yanına, Finlandiyaya yola düşərkən qarşıdakı yay tətilini səbirsizliklə gözləyirdi. Bu xoşbəxt günlərə kölgə salan yeganə məqam ən yaxın rəfiqəsi Emilinin bu yaxınlarda baş vermiş ölümü idi. Lakin yolüstü oteldə Avqustun çiynində yuxuya gedən qız gözlərini tamamilə fərqli bir fəsildə və köhnə mənzilində açır.

Yanında artıq sevmədiyi başqa bir kişi var, Avqustla tanışlığına isə hələ xeyli vaxt qalır. Keçmişə qayıtdığını anlayan Yuliana baş verənləri dəyişərək rəfiqəsinin ölümünün qarşısını almaq qərarına gəlir. Eyni zamanda o, bu addımların onu həyatının ən böyük sevgisindən birdəfəlik ayıra biləcəyindən narahatlıq keçirir.

«Fenster zum Sommer» adlı fantastik dram filmi rejissor Hendrik Handlöqten tərəfindən lentə alınıb. Almaniya və Finlandiyanın birgə istehsalı olan layihə 2011-ci ildə işıq üzü görüb. Ekran əsərində baş rolları Zuzanna Volf, Lars Aydinqer, Lotti Om və Oliviya Qraser canlandırırlar.