Mortal Kombat

Qarışıq döyüş növləri üzrə çıxış edən Koul Yanq pul müqabilində bilərəkdən məğlub olmağa öyrəşib. Öz köklərindən xəbərsiz olan döyüşçü Xarici dünyanın hökmdarı Şanq Tsunqun güclü kriomans Sab-Zironu onun izinə salmasından təəccüblənir. Doğmalarının təhlükəsizliyindən narahat olan Koula bədənində eyni əjdaha nişanı daşıyan mayor Caks kömək edir və onu Sonya Bleyqi axtarmağa göndərir.

Tezliklə Koul, Sonya və muzdlu döyüşçü Kano bu cür nişan daşıyanlara sığınacaq verən Lord Reydenin məbədinə çatırlar. Burada qəhrəmanlar təcrübəli döyüşçülər Lyu Kanq və Kunq Laonun rəhbərliyi altında məşq edirlər. Xarici dünyanın qüvvələri ilə qarşılaşmaq üçün onların hər biri daxili ruh gücünü, yəni arkananı aşkar etməlidir.

«Mortal Kombat» fantastik döyüş filmi rejissor Saymon Makkueyd tərəfindən lentə alınıb. 2021-ci il ABŞ istehsalı olan bu ekran işi «Ölümcül döyüş» franşizasının tərkib hissəsidir. Əsas obrazları Lyuis Tan, Coş Louson, Devid Fild və Cessika Maknemi canlandırıblar.