Göydən yerə

Qədim yunan rəqs ilahəsi Terpsixora Brodveydə doqquz ilham pərisinə həsr olunmuş yeni caz müziklinin quruluşundan bərk qəzəblənir. Səhnə əsərində onun obrazının hədsiz dərəcədə bayağı təqdim edilməsi pərinin səbrini daşırır. O, bu təhqiramiz yanaşmaya son qoymaq üçün tamaşanın rejissoru Denni Millerlə şəxsən görüşmək qərarına gəlir.

Digər tanrılardan yer üzünə enmək üçün icazə alan Terpsixora adi insan cildinə bürünərək Kitti Pendlton adını götürür. İlahə tamaşanı düzgün formaya salmaq üçün hazırlıqlara qoşulur və öz rolunun layiqincə canlandırılmasına çalışır. Lakin zaman keçdikcə o, rejissor Denniyə qarşı romantik hisslər bəsləməyə başlayır.

ABŞ istehsalı olan «Down to Earth» filmi 1947-ci ildə ekranlara çıxıb. Musiqili fentezi komediyasının quruluşçu rejissoru Aleksandr Holldur. Əsas rolları Rita Heyvort, Larri Parks, Mark Platt və Roland Kalver ifa ediblər.