Bulbbul

1881-ci ildə azyaşlı Bulbbul adlı qız varlı bir kişiyə ərə verilir və ərinin böyük malikanəsinə köçür. Orada o, öz həmyaşıdı olan qaynı Satya ilə tez bir zamanda dil tapır. Uşaqlar vaxtlarını birgə keçirir, oyunlar oynayır və bir-birlərinə qorxulu rəvayətlər danışırlar. Balaca qızın ən sevdiyi əhvalat isə ağaclarda məskən salan və ayaqları arxaya çevrilmiş qadın iblis haqqında olan nağıldır.

İyirmi il keçdikdən sonra Satya Londondakı təhsilini başa vurub doğma kəndinə qayıdır və burada silsilə kişi qətllərinin baş verdiyini öyrənir. Yerli sakinlər baş verənlərə görə meşədə yaşayan qədim ifritəni günahlandırırlar. Lakin artıq uşaqlıq nağıllarına inanmayan Satya həqiqəti üzə çıxarmaq üçün bu müəmmalı ölümləri təkbaşına araşdırmağa qərar verir.

«Bulbbul» filmi 2020-ci ildə Hindistanda rejissor Anvita Datt tərəfindən çəkilib. Fantaziya və detektiv janrlarını birləşdirən dram ekran əsərində əsas rolları Tripti Dimri, Avinaş Tivari, Rahul Bose və Parambrata Çatterci canlandırıb.