Doqquz

Nadir qırmızı kometin Yer kürəsinə yaxınlaşması bütün dünyada rabitənin və elektrik enerjisinin doqquz günlük tam kəsilməsi təhlükəsini yaradır. Astrofizik Albert Lüz bu qeyri-adi kosmik hadisəni müşahidə etmək üçün həmkarları ilə birlikdə Himalay dağlarındakı elmi bazaya yola düşür. O, münasibətləri heç də asan olmayan yeddiyaşlı oğlu Adamı da özü ilə aparır.

Qlobal qaranlığın başlanmasından az sonra dağdakı stansiyada sirli bir qadın peyda olur. Bu naməlum qonağın gəlişindən etibarən azyaşlı Adamın ətrafında qorxulu və izahı çətin olan hadisələr cərəyan etməyə başlayır.

Elmi-fantastika və qorxu janrlarını birləşdirən «9: Nine» filmi 2019-cu ildə Hindistanda çəkilib. Ekran əsərinin rejissoru Cünüz Məhəmməddir, əsas obrazları isə Pritxvirac Sukumaran, Vamika Qabbi, Alok və Prakaş Rac canlandırıblar.