Oh! Baby

Yaxınlarının Bəbi çağırdığı yetmiş yaşlı Savitri oğlunu təkbaşına böyüdüb boya-başa çatdırıb. İllər keçdikcə deyingən və çətin xasiyyətli qadına çevrilən Savitri ilə ailədəki daimi mübahisələr gəlininin səhhətini pisləşdirir. Qohumlarının onu qocalar evinə göndərmək niyyətindən sarsılan yaşlı qadın portret çəkdirmək üçün sirli bir fotostudiyaya üz tutur.

Fotoqrafın obyektivi qarşısına keçdikdən sonra inanılmaz hadisə baş verir: Savitri iyirmi dörd yaşlı gənc qız bədəninə qayıdır. «Oh! Baby» filminin qəhrəmanı əlinə düşən bu ikinci fürsətdən yararlanaraq vaxtilə gerçəkləşdirə bilmədiyi arzularının ardınca getməyi qərara alır.

Hindistan istehsalı olan bu musiqili fantastik komediyanı rejissor B.V. Nandini Reddi ərsəyə gətirib. 2019-cu ildə təqdim olunan ekran əsərinin baş rollarında Element, Aişvarya, Naqa Çaitanya və Caqapati Babu çəkiliblər.