Dözülməz qorxu

Ofis işçisi Markusun həyatı gərginlik, uğursuzluqlar və haqsızlıqlarla doludur. İş yoldaşları öz vəzifələrini onun boynuna yıxır, o isə zəhərli münasibətlərdən əziyyət çəkən qonşu qadına qarşılıqsız sevgi bəsləyir. Evinin yaxınlığında silahlı bir quldur ona hücum edir və qəhrəman çiynindən bıçaq yarası alsa da, cinayətkara cavab verə bilir.

Bu qanlı insident Markusun düşüncə tərzini tamamilə dəyişir və onda qisas hissini oyadır. Çəkdiyi əzabların acığını çıxmaq qərarına gələn Markus öz ədalət məhkəməsini qurur və cinayətkarları amansızcasına cəzalandırmağa başlayır.

Braziliya istehsalı olan «Dözülməz qorxu» (Uptake Fear) filmi 2016-cı ildə nümayiş olunub. Ekran əsərinə Armando Fonseka və Kapel Furman rəhbərlik ediblər. Filmin əsas rollarını Rikardu Jeli, Felipe Folyosi, Greta Elefteriu və Patrisiya Roşael canlandırıblar.