Mavi dünya nizamı

Qlobal fəlakətdən sonra yaranan güclü elektromaqnit dalğası planetdəki demək olar ki, bütün uşaqları məhv edib, sağ qalan böyüklərin şüuruna isə xüsusi nəzarət mexanizmi yeridilib. Hakimiyyəti ələ keçirən Usta Kreyn adlı diktator insanların iradəsini tamamilə idarə edir. Yalnız bu təsirə qarşı təbii immuniteti olan Ceyk Sleyter uzun müddət kimsəsiz ərazilərdə gizlənərək yaşamağı bacarır.

Lakin qızı Molli qəfil komaya düşdükdə, Ceyk tibbi yardım tapmaq ümidi ilə insan məskənlərinə üz tutmalı olur. Ətrafdakılar Mollinin Yer üzündə sağ qalan yeganə uşaq olduğunu anladıqdan sonra ata və qızının arxasınca amansız təqib başlayır.

«Mavi dünya nizamı» (Blue World Order) adlı elmi-fantastik döyüş filmi 2017-ci ildə Avstraliyada istehsal olunub. Ekran əsərinin quruluşçu rejissorları Çe Beyker və Dallas Bleynddir. Əsas obrazları Ceyk Rayan, Billi Zeyn, Brüs Spens və Cek Tompson canlandırıb.