Böyük illüziya

Birinci Dünya müharibəsi zamanı fransız hərbi pilotları Mareşal və de Boldyenin təyyarəsi alman zabiti fon Rauffenştayn tərəfindən vurulur. Sağ qalan hər iki pilot almanların hərbi əsir düşərgəsinə düşür. Burada onlar digər müttəfiq ingilis zabitləri ilə birləşərək azadlığa çıxmaq üçün gizli tunel qazmağa başlayırlar.

Fransız qoşunlarının Qərb cəbhəsindəki uğurlarından sonra əsirlərin yeri dəyişdirilir və onlar ciddi qorunan qalaya göndərilirlər. Yeni həbsxananın komendantı isə onları vuran köhnə tanışları fon Rauffenştayndır. O, fransızları ehtiramla qarşılasa da, bu qaladan qaçmağın qeyri-mümkün olduğunu bildirir.

«Böyük illüziya» (Grand Illusion) dram janrında 1937-ci ildə Fransa istehsalı olaraq ekranlaşdırılıb. Filmin rejissoru Jan Renuardır, əsas rolları Jan Qaben, Pyer Frene, Marsel Dalio və Erix fon Ştroheym canlandırıb.