Çerkassı

Kənddən gəlmiş iki gənc, Mişa və Lev, Ukrayna hərbi dəniz donanmasına çağırılaraq «Çerkassı» minaaxtaran gəmisinin heyətinə düşürlər. Gəmi Krımda yerləşən Donuzlav gölündəki bazada xidmət aparır. Gənclər burada hərbi nizam-intizama, gəmidəki mürəkkəb münasibətlərə və dəniz xidmətinin gündəlik çətinliklərinə alışmalı olurlar.

2014-cü ilin əvvəlində təlimlər davam edərkən ölkədə ciddi siyasi hadisələr cərəyan edir. Rus qoşunları Krıma nəzarəti ələ keçirir və açıq dənizə çıxış yollarını batırılmış gəmilərlə tamamilə bağlayır. Nəticədə «Çerkassı» digər Ukrayna gəmiləri ilə birlikdə körfəzdə tələyə düşür.

Ukrayna istehsalı olan «Çerkassı» tarixi hərbi dram filmi 2020-ci ildə nümayiş olunub. Ekran əsəri 2014-cü ilin yazında Donuzlav gölündə Ukrayna donanmasının üzləşdiyi real hadisələrdən bəhs edir.