Alay oğlu

Sovet artilleriya kəşfiyyatçıları meşədəki mərmi çalalarından birində ac və köməksiz kəndli uşağı Vanya Solntsevlə rastlaşırlar. Döyüşçülər kimsəsiz qalan oğlanı özləri ilə hərbi hissəyə gətirirlər. Lakin batareya komandiri kapitan Yenakiyev uşağın döyüş meydanında saxlanmasını qadağan edərək onun dərhal arxa cəbhəyə göndərilməsini tapşırır.

Qərargaha aparılarkən Vanya onu müşayiət edən əsgər Bidenkodan qaçmağı bacarır. Komandirin verdiyi əmri ləğv etdirəcək başqa bir zabit axtarışına çıxan balaca qəhrəman təsadüfən elə Yenakiyevin özü ilə üz-üzə gəlir. Cəsarətini nümayiş etdirən uşağı bəyənən kapitan onun batareyada qalmasına razılıq verir, zaman keçdikcə ona dərindən bağlanaraq oğulluğa götürmək qərarına gəlir.

«Alay oğlu» (Son of the Regiment) hərbi dram filmi 1946-cı ildə SSRİ-də rejissor Vasili Pronin tərəfindən ekranlaşdırılmışdır. Ekran əsərində baş rolları Yuri Yankin, Aleksandr Morozov, Qriqori Plujnik və Nikolay Parfyonov canlandırıblar.