Qorxunc bağlar

Ata ilə oğul arasındakı gərgin münasibətlər keçmişin qaranlıq səhifələri açılandan sonra başqa məcraya yönəlir. İkinci Dünya Müharibəsi zamanı atası üç dostu ilə birlikdə alman əsgərləri tərəfindən əsir götürülüb dərin bir çuxura salınmışdı. Dəmir yolu məntəqəsini partladan gizli təxribatçı üzə çıxmasa, onların hamısını edam gözləyirdi.

Ölüm anı yaxınlaşdıqca mühafizəçilərdən biri əsirlərin əhvalını qaldırmağa, onların diqqətini labüd sonluqdan yayındırmağa çalışır. Həmin əsgər məhbusları güldürməklə ağır anlarda insan ruhunu xilas edən ən güclü vasitənin məhz yumor olduğunu onlara əyani şəkildə sübut edir.

«Qorxunc bağlar» (Effroyables jardins) adlı hərbi dram filmi 2003-cü ildə Fransada lentə alınıb. Ekran əsərinin rejissoru Jan Bekkerdir. Baş rolları Jak Vilre, Andre Düssolye, Tyerri Lermitt və Benua Majimel canlandırıblar.