Şaftalı oğrusu

Hadisələr Birinci Dünya müharibəsinin sonlarında Tırnovo şəhərində cərəyan edir. Əsir düşmüş keçmiş serb müəllimi İvo aclığa tab gətirməyərək meyvə bağçasına gizlicə daxil olur. O, ağacdan şaftalı dərərkən bu mülkün yerli hakimiyyət nümayəndəsinə aid olduğundan xəbərsizdir.

Bağ şəhər rəhbəri olan polkovnik Mixailə məxsusdur. Həmin vaxt əsir hərbçini polkovnikin xanımı Liza görür. Təsadüfi qarşılaşma qadının həyatında gözlənilməz hisslərin oyanmasına və onun İvoya aşiq olmasına gətirib çıxarır.

«Şaftalı oğrusu» filmi 1964-cü ildə Bolqarıstanda istehsal edilib. Hərbi dram janrında çəkilmiş ekran əsərinin quruluşçu rejissoru Vılo Radevdir. Əsas rolları Nevena Kokanova, Rade Markoviç, Mixail Mixaylov və Vasil Vaçev canlandırıblar.