Frans

Birinci Dünya müharibəsinin bitməsindən sonra Anna həlak olmuş sevgilisi Fransın xatirəsi ilə yaşayır. Şeiriyyətə və skripka çalmağa böyük həvəsi olan gənc oğlan Fransada cəbhədə canını tapşırıb. Kədər içində qalan qız doğma alman şəhərində sevdiyi gəncin yaşlı valideynlərinə dəstək olur və hər gün onun məzarını ziyarət edir.

Bir gün qəbiristanlıqda gözlənilməz bir mənzərə yaranır. Anna Fransın məzarına gül qoyan Adrien adlı gənc bir fransızla qarşılaşır. Dünənki düşmən ölkənin nümayəndəsinin bura gəlişi ailədə təəccüb doğursa da, bu qəribə görüş qızın sonrakı taleyində dərin iz buraxır.

«Frantz» adlı tarixi hərbi dram 2016-cı ildə Fransa və Almaniyanın birgə istehsalı ilə lentə alınıb. Rejissor Fransua Ozonun ərsəyə gətirdiyi ekran əsərində əsas rolları Pyer Nine, Paula Ber, Ernst Ştötsner və Mariya Qruber canlandırıb.