Keyn üsyanı

1944-cü ildə Sakit okeandakı hərbi əməliyyatlar zamanı ABŞ donanmasına məxsus «Keyn» esminesinə yeni kapitan təyin olunur. Filip Frensis Kuiqq həddindən artıq şübhəçi, xırdalıqlara ilişən və heç bir etirazı qəbul etməyən bir zabitdir. İntizama qarşı bu cür ifrat tələblər gəminin idarə olunmasına mane olur, döyüş tapşırıqları zamanı ciddi xətalara yol açır və zabitlərdə rəhbərin ruhi vəziyyəti ilə bağlı şübhələr oyadır.

Gəmi amansız tufana düşdükdə və batmaq təhlükəsi yarandıqda leytenant Stiv Merik nizamnaməyə əsaslanaraq idarəçiliyi öz üzərinə götürür və kapitanı səlahiyyətlərindən məhrum edir. Hadisədən sonra Merik hərbi məhkəmə qarşısına çıxarılaraq qiyamda ittiham olunur. Təqsirsiz olduğunu bildirən leytenant vəkili ilə birlikdə Kuiqqin böhran anında gəmini idarə etmək qabiliyyətində olmadığını sübut etməyə çalışır.

ABŞ istehsalı olan «Keyn üsyanı» adlı hərbi dram filmi 1954-cü ildə rejissor Edvard Dmitrik tərəfindən lentə alınıb. Baş rolları Hemfri Boqart, Xose Ferrer, Van Conson və Fred Makmürrey canlandırıblar.