Toy gecəsi

1942-ci ilin yayında partizan rabitəçisi Valya Merejko şəhərdəki gizli təşkilatla əlaqə qurmaq tapşırığı alır. Onun qarşılaşdığı şəxs müharibədən əvvəl sevdiyi Stepan olur. Bir il sonra xüsusi tapşırıq üçün partizan dəstəsinə cəbhə arxasından Maşa adlı kəşfiyyatçı gəlir. Valya onu Stepan vasitəsilə gizli fəaliyyət göstərənlərlə tanış edir, lakin zaman keçdikcə Stepanın Maşaya qarşı hisslər bəslədiyindən şübhələnir.

Qısqanclığa dözə bilməyən Valya gizlicə şəhərə yollanır və Stepanla Maşanın toy mərasiminə şahid olur. O bilmir ki, bu evlilik partizanların qurduğu xüsusi plandır. Təntənəli toy vasitəsilə dəmir yolu stansiyasını işıqlandırmaq və sovet bombardmançı təyyarələrinə zərbə endirmək üçün şərait yaratmaq nəzərdə tutulub.

«Toy gecəsi» hərbi dramını rejissor Aleksandr Karpov çəkib. SSRİ istehsalı olan bu film 1980-ci ildə ekranlara çıxıb. Əsas rollarda İrina Korıtnikova, Natalya Andreyçenko, Mixail Dolqinin və Aleksey Vertinski çəkiliblər.