Müsyö Batinyol

1942-ci ilin yayında alman qoşunları tərəfindən işğal edilmiş Fransada qəssab dükanının sahibi Edmon Batinyol baş verənlərə qarışmamağa çalışır. Ətrafdakı siyasi vəziyyət onu zirzəmisindən oğurlanan ət məhsulları qədər narahat etmir. Şübhələr isə qonşuluqda yaşayan yəhudi ailəsinin övladı Simonun üzərinə düşür.

Nasistlər qonşuları deportasiya edəndə qəssab onlara xüsusi rəhm bəsləmir. Lakin bir müddət sonra almanlardan qaçmağı bacaran kimsəsiz oğlan qəfildən Edmonun qapısında peyda olur. Qəssab Simonu xilas etmək qərarına gəlir və uşaqla birlikdə İsveçrə sərhədinə doğru yola düşür, yol boyunca onların münasibəti dostluğa çevrilir.

«Monsieur Batignole» filminin rejissoru həm də baş rolu canlandıran Jerar Jünyodur. 2002-ci il Fransa istehsalı olan bu hərbi dram və komediya filmində rolları Jülyen Sitruk, Mişel Qarsiya və Jan-Pol Ruv paylaşıblar.