Ruhun zəfəri

Gənclik illərindən boksla məşğul olan Salamo orta çəkidə Balkan çempionu titulunu qazanmağı bacarır. Lakin faşistlərin gəlişi hər şeyi alt-üst edir və paltarlarında sarı ulduz daşıyan digər insanlar kimi o da Polşadakı konsentrasiya düşərgəsinə göndərilir.

Düşərgədə sağ qalmaq üçün ona dəhşətli bir fürsət verilir: yenidən rinqə çıxıb döyüşmək. Şərtlər olduqca sərtdir, çünki onun qalib gəldiyi hər qarşılaşmadan sonra məğlub olan rəqib dərhal qaz kamerasına göndərilir. Yaşamaq üçün boksçunun heç vaxt məğlub olmamaqdan başqa yolu qalmır.

1989-cu il istehsalı olan bu tarixi hərbi dramı amerikalı rejissor Robert M. Yanq lentə alıb. Əsas rolları Uillem Defo, Edvard Ceyms Olmos, Robert Lodca və Vendi Qazell canlandırıblar.