Armadillo

2009-cu ilin fevralında danimarkalı sənədli film heyəti Əfqanıstanın Hilmənd vilayətində yerləşən NATO-nun «Armadillo» bazasına yollandı. Həmin ərazi «Taliban» qüvvələrinə qarşı hərbi toqquşmaların mərkəzi idi. Çəkiliş qrupu əfqan xalqına yardım etmək məqsədilə qaynar nöqtəyə göndərilən gənc əsgərlərin yanında altı ay keçirdi.

Ekran əsəri hərbi qulluqçuların gündəlik məişətini, patrul xidmətini və real döyüş anlarını əks etdirir. Müəlliflər hərbi əməliyyatların gedişində əsgərlərin psixoloji vəziyyətinin, əhval-ruhiyyəsinin və baş verənlərə baxışının necə dəyişdiyini lentə alıblar. Bir qrup taliban döyüşçüsünün zərərsizləşdirilməsi səhnəsi cəmiyyətdə xüsusi rezonans doğurdu.

«Armadillo» adlı sənədli filmin rejissoru Yanus Metsdir. Danimarka və İsveç istehsalı olan bu layihə 2010-cu ildə işıq üzü görüb.