Namhansanseong Qalası

1636-cı ildə mancur qoşunları Çoson torpaqlarına daxil olur. Paytaxtın ələ keçiriləcəyini anlayan kral İnco və əyanları Namhan dağında yerləşən möhkəm qalaya pənah aparırlar. Daş divarlar və təxminən on dörd minlik döyüşçü heyəti düşmən hücumlarının qarşısını alsa da, ərzaq qıtlığı vəziyyəti çətinləşdirir.

Düşmən qərargahına danışıqlara yollanan nazir Çhve geri qayıdaraq mancurların vəliəhdi girov istədiyini bildirir və bu tələbi qəbul etməyi məsləhət görür. Digər tərəfdən nazir Kim təslim olmağın əleyhinə çıxır, sonadək müqavimət göstərməyi və cənubdan gələcək köməyi gözləməyi tələb edir.

«Namhansanseong» adlı tarixi hərbi dram 2017-ci ildə Cənubi Koreyada istehsal olunub. Filmin rejissoru Hvan Don-hyokdur, əsas rolları isə Kim Yun-sok, Kim Mun-çhan, Con Hi-ryon və Mun Çhan-gil canlandırıblar.