Böyük gəzinti

1942-ci ildə Paris səmasında mühüm tapşırığı yerinə yetirən Britaniya bombardmançı təyyarəsi vurulur. Təyyarəni tərk etmək məcburiyyətində qalan heyət üzvləri türk hamamında görüşmək barədə razılaşaraq paraşütlə şəhərin müxtəlif yerlərinə enirlər. Ekipaj komandiri zooparkdakı suitilərin hovuzuna düşür, digər iki pilot isə paytaxt binalarının damlarına eniş edir.

Eniş edən pilotlardan birinə rəngsaz Ogüsten Buve rast gəlir və ona sığınacaq verir. Digər ingilis əsgəri isə Paris Operasının damına düşərək baş dirijorun mənzilində gizlənir. Adi fransız vətəndaşları təsadüfən müttəfiq hərbçiləri xilas etmək və onları bir araya gətirmək planına qoşulmalı olurlar.

«Böyük gəzinti» (La grande vadrouille) filmi 1966-cı ildə rejissor Jerar Uri tərəfindən Fransa və Böyük Britaniyanın birgə istehsalı kimi çəkilib. Ekran əsərində baş rolları məşhur aktyorlar Burvil, Lui de Fünes, Klaudio Bruk və Andrea Parizi canlandırıblar.