Mandarinlər

Hadisələr 1992-ci ildə Abxaziya torpağında cərəyan edir. Dağlarla dəniz arasındakı qədim eston kəndinin sakinləri öz tarixi vətənlərinə köçüb və burada cəmi bir neçə nəfər qalıb. Yaşlı İvo boş yeşiklər hazırlayır, qonşusu Marqus isə yalnız mandarin məhsulunu yığdıqdan sonra getməyi planlaşdırır. Kənd həkimi Yuxan da artıq yola düşmək ərəfəsindədir.

Silahlı qarşıdurma kəndin astanasına çatır və gürcülərlə abxazlar arasında qanlı toqquşma baş verir. Döyüşdən sonra İvo və Marqus abxaz tərəfində vuruşan yaralı çeçen döyüşçüsü Əhmədi tapıb evə gətirirlər. Həlak olanları dəfn edərkən isə gürcü əsgəri Nikanın da sağ qaldığı məlum olur. Beləliklə, bir-birinə düşmən kəsilmiş iki yaralı döyüşçü eyni damın altında qalmalı olur.

«Mandariinid» filmi 2013-cü ildə nümayiş olunub. Gürcüstan və Estoniya istehsalı olan bu hərbi dramın rejissoru Zaza Uruşadzedir. Əsas rolları Lembit Ulfsak, Giorgi Nakaşidze, Elmo Nüqanen və Mişa Mesxi canlandırıb.