Roma imperiyası: Avqust

Qay Yuli Sezarın qətlindən sonra Roma dövləti rəhbərsiz qalır və Mark Antoni hakimiyyəti təkbaşına ələ keçirməyə çalışır. Lakin diktatorun vəsiyyətnaməsi bütün planları alt-üst edir. Sezar öz varisi kimi övladlığa götürdüyü gənc Qay Oktavini təyin etdiyini bildirir və bu addım iki iddiaçı arasında kəskin qarşıdurma yaradır.

Nüfuz uğrunda mübarizə qanlı müharibəyə çevrilir. Antoninin və onun həyat yoldaşı Kleopatranın birləşmiş qoşunları ağır məğlubiyyətə uğrayaraq Misirə qaçırlar. Bir il sonra Oktavinin ordusu İsgəndəriyyəni ələ keçirir, məğlub olan cütlük isə intihar edir. Zəfərlə paytaxta qayıdan varis konsul seçilir və ona Avqust adı verilir.

«Imperium: Augustus» tarixi filmi rejissor Rocer Yanq tərəfindən ekranlaşdırılıb. İtaliya, Almaniya, Fransa, İspaniya və Avstriyanın birgə istehsalı olan layihədə əsas rolları Antonio Petroçelli, Jerar Kleyn, Rikkardo De Torrebruna və Massimo Qini canlandırıblar. Ekran əsəri 2003-cü ildə işıq üzü görüb.