Sakit okeanda cəhənnəm

İkinci Dünya müharibəsinin gedişində iki düşmən əsgər Sakit okeanın kimsəsiz bir adasında üz-üzə gəlir. Biri amerikalı təyyarəçi, digəri isə yapon zabitidir. Quru parçasında tək qalan bu iki nəfər hərbi qarşıdurmanın qurbanına çevrilirlər.

İlk vaxtlar tərəflər bir-birinə nifrət bəsləyir və qarşı tərəfi məhv etmək üçün fürsət axtarır. Sonradan hər iki hərbçi hiylə yolu ilə canını qurtarmağa çalışsa da, təklikdə sağ qalmağın qeyri-mümkün olduğunu başa düşürlər. Adadan uzaqlaşmaq məqsədilə onlar aralarındakı nifrəti kənara qoyub birgə sal düzəltməyə başlayırlar.

«Hell in the Pacific» adlı hərbi-macəra filmi 1968-ci ildə ABŞ-da istehsal olunub. Rejissor Con Burmenin çəkdiyi ekran əsərində baş rolları Li Marvin və Toşiro Mifune canlandırıb.