Tobruka taksi

Hadisələr müharibə dövründə Şimali Afrika torpaqlarında cərəyan edir. Dörd fransız əsgəri rəqib qüvvələrin nəzarətində olan səhra zonasından keçərək öz ordularına çatmağa çalışır. Müxtəlif dünyagörüşünə və xarakterə malik bu insanlar sağ qalmaq naminə birgə hərəkət etmək məcburiyyətində qalırlar.

Yol boyu dəstə savadlı və əsilzadə bir alman zabitini əsir götürür. Çətin vəziyyətinə baxmayaraq, əsir ləyaqətini qoruyur və qaçmaq üçün əlverişli fürsət axtarır. Təhlükələrlə dolu bu çətin səfərdə tərəflər daxili gərginlik yaşasalar da, silahsız düşməni məhv etməkdən və ya onu susuz səhrada ölümə tərk etməkdən çəkinirlər.

«Un taxi pour Tobrouk» hərbi dramını rejissor Deni de La Pateler ərsəyə gətirib. 1961-ci ildə Fransa, İspaniya və AFR-in birgə istehsalı kimi təqdim edilən ekran əsərində baş rolları Hardi Krüger, Lino Ventura, Moris Biro və Şarl Aznavur canlandırıb.