Rozenştrasse

2001-ci ildə Nyu-Yorkda ərinin vəfatından sonra Rut dərin sarsıntı keçirir və daxili dincliyini itirir. Qızı Hanna anasının keçmişi ilə bağlı gözlənilməz həqiqətləri öyrənir. Bəlli olur ki, yəhudi olan nənə və babası İkinci Dünya müharibəsi zamanı sürgün edilib, balaca Rutu isə Lena adlı alman qadın böyüdüb.

Ailə tarixçəsini anlamağa çalışan Hanna anasını xilas etmiş həmin qadını axtarmaq üçün Berlinə yollanır. O, artıq doxsan yaşına yaxınlaşan Lenanı tapmağı bacarır. Qoca qadın Hannaya Berlindəki məşhur həbsxananın yerləşdiyi Rozenştrasse küçəsindəki qadınların başına gələnləri danışır.

«Rosenstrasse» adlı hərbi dram filmi 2003-cü ildə Almaniya və Niderlandın birgə istehsalı ilə çəkilib. Ekran əsərinin rejissoru Marqarete fon Trottadır. Əsas rolları Katya Riman, Mariya Şrader, Doris Şade və Yutta Lyampe canlandırıblar.