Saulun oğlu

1944-cü ildə Auşvits ölüm düşərgəsindəki yəhudi məhbus Saul Auslander xüsusi komandanın tərkibində işləməyə məcburdur. Onun vəzifəsi yeni gələn insanları qaz kameralarına ötürmək və oradakı izləri növbəti qrup üçün təmizləməkdir. Növbəti qətliamdan sonra cəmi bir neçə dəqiqə sağ qalan azyaşlı bir uşağı görən Saul onu öz oğlu hesab edir və cənazəni dini qaydalara uyğun dəfn etməyi qərara alır.

Kişi uşağın cəsədini sobalardan qorumağa və düşərgə ərazisində gizlicə ravvin tapmağa çalışır. Həmin vaxt digər məhbuslar silahlı üsyana hazırlaşarkən, Saul yalnız uşağın dəfni barədə düşünür və özünü təhlükəyə atır. Ətrafdakılar bu niyyəti mümkünsüz saysa da, o, bəlkə də heç vaxt var olmayan oğlunun xatirəsindən vaz keçmir.

Macarıstan istehsalı olan «Saul fia» hərbi dram filminin rejissoru Laslo Nemeşdir. Əsas rolları Geza Roriq, Levente Molnar, Urs Rehn və Todd Şarmon canlandırıblar. Ekran əsəri 2015-ci ildə nümayiş olunub.