Körpü

İkinci Dünya Müharibəsinin son günlərində alman ordusu ardıcıl məğlubiyyətlərlə geri çəkilir. Balaca bir Almaniya qəsəbəsinə Amerika hərbi birləşmələrinin daxil olacağı gözlənilir. Çıxılmaz vəziyyətdə qalan komandanlıq canlı qüvvə çatışmazlığını aradan qaldırmaq üçün məktəb partası arxasından yeniyetmələri orduya cəlb edir.

Silah altına alınanlar arasında özlərini döyüşdə sübut etməyə can atan yeddi sinif yoldaşı da var. Rəhbərlik bu gəncləri təhlükədən qorumaq məqsədilə heç bir mühüm hərbi əhəmiyyəti olmayan yerli körpüyə keşikçi təyin edir. Lakin hadisələrin gedişatı elə dəyişir ki, qəsəbəyə doğru irəliləyən Amerika qoşunlarının qarşısında yalnız bu yeniyetmələr qalır.

Rejissor Bernhard Vikkinin çəkdiyi «Körpü» tarixi dramı 1959-cu ildə Qərbi Almaniyada istehsal olunub. Filmdə əsas rolları Folker Bonet, Frits Vepper, Mixael Xints və Frank Qlaubrext canlandırıb.