Kipchoge: The Last Milestone

Keniyalı qaçışçı Eliud Kipchoge artıq olimpiya çempionu və dünya rekordçusu statusuna sahib olanda, 2017-ci ildə marafon məsafəsini iki saatdan az müddətdə qət etməyə çalışdı. Həmin vaxt qarşıya qoyulan hədəfə çatmaq üçün ona cəmi 25 saniyə çatmamışdı. Lakin bu uğursuzluq idmançını yolundan döndərmədi və o, insan imkanlarının sərhədlərini yenidən sınamaq qərarına gəldi.

Atlet öz komandası və alimlərlə birlikdə yeni qaçış üçün xüsusi hazırlıq prosesinə başladı. Bu mərhələ Keniyadakı məşq bazasında aparılan intensiv hazırlıqları və Avropanın ixtisaslaşmış elmi mərkəzlərində keçirilən yüksək texnologiyalı testləri əhatə etdi.

Böyük Britaniya istehsalı olan «Kipchoge: The Last Milestone» sənədli filmini rejissor Ceyk Skott ərsəyə gətirib. 2021-ci ildə işıq üzü görən ekran əsəri məşhur stayerin tarixi sınağa hazırlıq yolunu əks etdirir.