Təkərlər üzərində

Fred sevgilisinin ərköyün oğlunun könlünü almaq üçün sevimli komandasının oyunçusundan avtoqraflı basketbol topu tapmağa çalışır. Lakin bir maneə var: bu hədiyyə yalnız əlilliyi olan azarkeşlərə təqdim edilir. Məqsədinə çatmaq istəyən Fred yalan danışmağı seçir və əlil arabasına əyləşərək matça yollanır.

Fənd baş tutur və o, arzulanan topu əldə edir, lakin vəziyyət gözlənilmədən qəlizləşir. Əlil azarkeşlər haqqında sənədli film çəkən gənc rejissor Denis Fredə diqqət yetirir. Həqiqətin üzə çıxmaması üçün qəhrəman başladığı oyunu davam etdirməyə və əlil rolunu oynamağa məcbur qalır.

«Təkərlər üzərində» (Wo ist Fred?) adlı idman və komediya janrındakı filmi rejissor Anno Zaul lentə alıb. 2006-cı ildə Almaniyada çəkilən ekran əsərinin baş rollarında Til Şvayger, Aleksandra Mariya Lara, Yurqen Fogel və Anya Klinq yer alıb.