Milyarderə necə ərə getməli

İngiltərənin kiçik bir şəhərindən olan təvazökar Kim Alp dağlarındakı dəbdəbəli xizək kurortunda xidmətçi işinə düzəlir. Ətrafdakı zəngin həyat tərzinə uyğunlaşmaq onun üçün asan olmur. Lakin qısa müddət sonra gənc qız snoubord sürməkdə böyük istedada malik olduğunu kəşf edir və dağ yamaclarına maraq göstərməyə başlayır.

Kim böyük mükafat fondu olan snoubord üzrə Dünya Kubokunda yarışmaq qərarına gəlir. Eyni zamanda, o, kurort sahibinin yaraşıqlı oğluna qarşı hisslər bəsləməyə başlayır. Həmin gənc oğlanın oraya rəfiqəsi ilə birlikdə gəlməsi isə münasibətləri qəlizləşdirir və qəhrəmanı onun səmimiliyinə şübhə ilə yanaşmağa vadar edir.

«Chalet Girl» romantik idman komediyası rejissor Fil Treyl tərəfindən lentə alınıb. Böyük Britaniya, Almaniya və Avstriyanın birgə istehsalı olan bu film 2011-ci ildə nümayiş olunub. Baş rolları Felisiti Cons, Ed Vestvik, Təmzin Ecerton və Bruk Şilds canlandırıblar.